КИНО: 33 жилийн турш илрээгүй цуврал хүн амины хэрэг

0
952

Та бүхэнд бодит явдлаас сэдэвлэн бүтээсэн Солонгос киног цувралаар танилцуулж байгаа билээ. Энэ удаа Солонгост гарсан хамгийн алдартай цуврал хүн амины хэргийн тухай өгүүлсэн “Memories of Murder” киног танилцуулж байна.

Тус кино нь 2003-н оны дөрвөн сард нээлтээ хийсэн бөгөөд найруулагчаар Оскарын шагнал хүртсэн “Шимэгч” киноны найруулагч Бун Жүн Ху ажиллажээ. Уг бүтээлийг 1986-н онд Гёнгиду Хвасонд гарсан цуврал хүн амины хэргээс сэдэвлэн бүтээсэн аж. Киноны хувьд цагдаа нар 1986 оноос 1991 оны хооронд гарсан цуврал хүн амины хэргийн хэрэгтнийг хайж буй талаар өгүүлдэг байна. 

Киноны гол дүрд “Шимэгч” киногоор бидэнд танил болсон жүжигчин Сун Ган Ху тогложээ.

Мөн жүжигчин Ким Сан Гён Сөүлээс хөдөөний тосгонд очиж хэрэг мөрдөж буй мөрдөгчийн дүрд тогложээ. Тус бүтээл нь нээлтээ хийсэн даруй таван сая гаруй хүн үзсэн байна. 

  Бодит хэргийн хувьд хамгийн эхний хохирогч нь 70 настай эмэгтэй байсан бөгөөд Хвасон тосгоны ойролцоогоос 1986-н оны 9 сарын 14-ны өдөр олдсон байна. Тухайн үед  цагдаа нар хамгийн эхний хохирогчийг машинд дайруулан нас барсан байж магадгүй хэмээн таамаглаж байжээ. Гэвч нэг сарын дараа хэрэгтэн 25 настай эмэгтэйн аминд дахин хүрсэн ба цогцсыг анхны хэрэг гарсан газраас холгүй олсон байна. Ингээд төд удалгүй 1986 оны 12 сарын 12-нд 25 настай бүсгүй сураггүй алга болсон бөгөөд түүний цогцос дөрвөн сарын дараа мөн л хэрэг гарсан газрын ойролцоогоос олджээ. Харин дөрөв дэх хохирогч удахгүй хуримаа хийх гэж байсан эмэгтэй байсан бөгөөд Сүвон хотод найз залуугийнхаа эцэг эхтэй танилцаад буцах замдаа сураггүй алга болж 1986 оны 12 сарын 14-нд цогцос нь олдсон байна. Ингээд 1987 оны 1,5,9-н сард нэмж гурван хүн амины хэрэг бүртгэгджээ. Тухайн үед хэргийг мөрдөж байсан цагдаа нар хэргийн газраас хэрэгтний ул мөрийг олж чадаагүй байна. Гэвч хэрэгтний гараас амьд гарч чадсан эмэгтэй байсан бөгөөд түүнээс цагдаа нар хэрэгтний царай, өндөр гэх мэт мэдээллийг авч чаджээ. Гэсэн хэдий ч долоон эмэгтэйн аминд хүрсэн хэрэгтэн дахин гурван хүний аминд дахин хүрсэн байна. Ингээд 1986 оноос 1991 оныг хүртэл нийт арван эмэгтэйн аминд хүрсэн хэрэгтэн 33-н жилийн дараа буюу 2019 онд баригджээ. Хэрэгтэн нь 1994 онд хүн амины хэргээр 25 жилийн ял сонсож Бусан хотын шоронд хоригдож байсан И Жүн Жэ гэгч байжээ.

               Хэрэгтний бодит зураг 

 

Солонгос мэдээ булан

WWW.MGLRADIO.COM

Сэтгэгдэл үлдээх