Солонгост халдварын шинж тэмдэггүй нас барах тохиолдол нэмэгдэж байна

0
2033

БНСУ-д өнөөдрийн/2020.06.17/ байдлаар шинээр 43-н тохиолдол бүртгэгдсэн бөгөөд 12 нь хилийн чанадаас зөөвөрлөгдөн орж ирсэн аж. Сүүлийн сарын байдлаар БНСУ-д халдварын тоо нэмэгдэх хандлагатай байгаа ч Солонгос улсын эрүүл мэндийн байгууллагаас хамгийн их анхаарал хандуулж буй асуудлуудын нэг бол халдварын шинж тэмдэггүй иргэдийн нас барсан тохиолдлууд юм.

Инчон хотод амьдардаг 80 настай иргэн халдвар илэрсэн “Richway” худалдааны төвөөр 5-н сарын 30-ны өдөр үйлчлүүлсэн бөгөөд тухайн үед коронавирусийн халдварын шинжилгээ өгч хариу нь сөрөг гарч гэртээ тусгаарлагдаж эхэлсэн байна. Гэвч түүнд энэ сарын 11-ны өдөр дахин шинжилгээ хийхэд хариу нь эерэг гарсан бөгөөд ямар ч халдварын шинж тэмдэг илрээгүй хэдий ч уушги нь хэдийн маш их гэмтсэн байжээ. Ингээд харамсалтай нь эмчилгээ хийлгээд дөрөв ч хонолгүй нас барсан байна.

Мөн өнгөрөгч 3-н сарын 1-ны өдөр Гёнбуг Гёнсанд амьдардаг 61 настай иргэн тархинд цус харвах өвчний шинж тэмдэг илэрч түргэнд дуудлага өгсөн байна. Ингээд тус хотын Сүнчонхян их сургуулийн эмнэлэгт хүргэгдсэн бөгөөд шинжилгээ өгөхөд коронавирусийн халдвар авсан нь тодорхой болжээ. Гэвч тус иргэнд өмнө нь халдварын шинж тэмдэг илрээгүй бөгөөд уушгины зураг авахуулахад мөн л уушги нь маш их гэмтсэн байжээ. Харамсалтай тус иргэн ч мөн эмчилгээ хийлгэж эхлээд хоёр ч хонолгүй нас барсан аж. Энэ мэт халдварын ямар нэг шинж тэмдэг илрээгүйн улмаас халдвар авснаа ч мэдэлгүйгээр нас барсан тохиолдол хэд хэдэн удаа бүртгэгдсэн байна. Түүнчлэн сүүлийн үед бүртгэгдэж байгаа тохиолдлуудын 30 гаруй хувь нь ямар ч халдварын шинж тэмдэг илрээгүй өвчтөнүүд аж. Мөн халдварын шинж тэмдэггүй өвчтөнүүдийн талаарх судалгаанаас үзэхэд дийлэнх нь 50-аас 80 насны өндөр настнууд байжээ. Тиймээс эдгээр халдварын шинж тэмдэггүй иргэд халдвар авснаа мэдэлгүйгээр халдвар тараах нөхцөл бүрдээд байгаа учир БНСУ-ын эрүүл мэндийн байгууллагаас тус асуудалд онцгой анхаарал хандуулан ажиллаж байгаа юм.

Солонгос мэдээ

WWW.MGLRADIO.COM

Сэтгэгдэл үлдээх