Халдвар авсан хүн ХОНОГТ нэг цаг унтахад ч хэцүү байдаг”

0
64

Коронавирусийн эсрэг эмчилгээ хийлгэж байгаа 20 гаруй насны залуу Солонгосын CBS Радиод ярилцлага өгчээ. Тэрээр өнгөрсөн 2-р сард оюутан солилцоогоор Истанбулыг зорьсон ч тэнд халдвар гарч, 4-р сард нутаг буцжээ. Тэрээр Сөүл хот дахь гэртээ тусгаарлагдаж байсан ч шинжилгээний хариу эерэг гарч одоог хүртэл нийт 51 хоногийн турш эмчилгээ хийлгэж байна. Коронавирусийн халдвар авсан иргэдийг бүрэн эдгэрснийг шалгахын тулд халдварын шинжилгээ хэд хэдэн удаа авдаг бөгөөд бүх шинжилгээний хариу сөрөг гарснаар эмнэлгээс гаргадаг ажээ. Харин уг залуугийн биеийн байдал тогтвортой сайн байгаа хэдий ч шинжилгээний хариу нь заримдаа эерэг гарч, заримдаа сөрөг гарах тохиолдол байгаа учир эмнэлгээс түүнийг үргэлжлүүлэн эмчилж байгаа талаар ярьжээ. Тэрээр “Би хоногт дээд тал нь нэг цаг л унтдаг байсан. Учир нь маш өндөр халуурч, булчин хүчтэй өвддөг. Мөн ДОХ-ын үед хэрэглэдэг калетра гэх эмийг хоёр долоо хоногийн турш уусан нь ходоодны үйл ажиллагаанд хүчтэй нөлөөлж хоол идэх, ус уухад хүртэл үнэхээр хэцүү байсан. Залуу хүн юм чинь гээд коронавирусийг үл тоомсорлож, туссан ч дороо эдгэчихнэ гэж бодож байсан үеэ одоо бодохоор үнэхээр их харамсаж байна. Залуучууд тэр тусмаа 20-30-н насныхан уг өвчин үнэхээр хүнд хэцүү өвчин гэдгийг ойлгоосой гэж хүсэж байна. Мөн энэ өвчин амь насанд аюултайгаар зогсохгүй хайртай гэр бүлийнхэн чинь ч мөн халдвар авч өвдөх магадлалтай учир анхаарал болгоомжтой байж, шөнийн цэнгээний газар явж зугаалахгүй байгаасай гэж хүсч байна” гэжээ.

Солонгос мэдээ булан

WWW.MGLRADIO.COM

Сэтгэгдэл үлдээх