Юн Сок Ёл: БНАСАУ аюул занал учруулж байгаа ч яриа хэлэлцээний үүд хаалга нээлттэй

2022-05-12

СӨҮЛ. /Reuters/. "БНАСАУ-ын зэвсгийн хөтөлбөрүүд аюул занал учруулж байгаа ч тус улс цөмийн зэвсгээс ангижрах үүрэг амлалт өгвөл эдийн засгийн “зоримог” төлөвлөгөө санал болгоход бэлэн байна" гэж БНСУ-ын шинэ Ерөнхийлөгч Юн Сок Ёл өнөөдөр мэдэгдлээ.

Юн Сок Ёл Сөүл хотноо парламентын өмнө тангараг өргөснийхөө дараа үг хэлэх үеэрээ ийнхүү мэдэгджээ. Прокуророор 26 жил ажилласан тэрбээр улс төрд хөл тавиад жил хүрэхгүй хугацааны дараа консерватив үзэлт “Иргэний хүч” намаас ерөнхийлөгчийн сонгуульд нэр дэвшин гуравдугаар сард ялалт байгуулсан юм.

Өдгөө 61 настай Юн Сок Ёл албан тушаалаа хүлээн авснаар БНАСАУ шинэ зэвсгүүд туршиж байгаа, мөн хоёр жил үргэлжилсэн “COVID-19” цар тахлын хямралаас эдийн засаг сэргэхэд инфляц сөргөөр нөлөөлж болзошгүй гэсэн хоёр томоохон асуудалтай тулгарч байна.

Тэрбээр БНАСАУ-ын талаар илүү хатуу бодлого баримталж, хэрэв дайралт хийх шинж ажиглагдвал өрссөн цохилт өгөхийг анхааруулаад байсан ч Пёньянтай зогсонги байдалд ороод буй цөмийн зэвсгээс ангижрах хэлэлцээг дахин эхлүүлэх хүсэлтэй байгаагаа хэлсэн үгэндээ цохон тэмдэглэжээ.

“БНАСАУ-ын цөмийн зэвсгийн хөтөлбөрүүд нь зөвхөн манай төдийгүй Зүүн Хойд Азийн аюулгүй байдалд аюул занал учруулж байгаа хэдий ч үүнийг энхийн замаар шийдвэрлэх боломжтой учир яриа хэлэлцээ хийх үүд хаалга нээлттэй хэвээр байх болно” гэж Юн Сок Ёл хэлсэн байна.

Тэрбээр үргэлжлүүлэн, “Хэрэв БНАСАУ цөмийн зэвсгээс ангижрах үйл явцыг чин үнэнээсээ эхлүүлбэл бид БНАСАУ-ын эдийн засаг, ард иргэдийн амьжиргааны түвшнийг сайжруулах “зоримог” төлөвлөгөөг санал болгохын төлөө олон улсын хамтын нийгэмлэгтэй хамтран ажиллахад бэлэн байна" гэв.

БНСУ-д тэгш бус байдал, орон сууцны үнэтэй холбоотой олон нийтийн бухимдал улам гүнзгийрч байгаа энэ үед Юн Сок Ёл авлигатай тэмцэж, эдийн засгийн илүү тэгш нөхцөлийг бий болгох амлалт өгсөн билээ. 

Сэтгэгдэл (0)