БНАСАУ-ын удирдагч эцгийнхээ дурсгалыг хүндэтгэх ёслолд оролцжээ

2022-02-17

ПЁНЬЯН. /KCNA/. БНАСАУ-ын удирдагч Ким Жөн Ун мягмар гарагт эцэг Ким Жөн Ирийнхээ дурсгалыг хүндэтгэлээ гэж Солонгосын төв цахилгаан мэдээний агентлаг (KCNA) мэдээлжээ.

“Удирдагч Ким Жөн Ун баяр ёслолын арга хэмжээнд оролцож, удирдагч агсан Ким Жөн Ирийн хөшөөнд цэцэг өргөлөө” гэж КCNA агентлагийн мэдээнд дурдсан байна. БНАСАУ-ын удирдагчийг Солонгосын Хөдөлмөрийн намын Төв Хорооны Суртал, ухуулгын хэлтсийн орлогч дарга Ким Ё Жон тэргүүтэй өндөр албан тушаалын хүмүүс дагалдан явсан байна.

"Нодон синмун" сонинд мэдээлснээр, БНАСАУ-ын удирдагч агсан, тус улсын одоогийн удирдагч Ким Жөн Уны эцэг Ким Жөн Ирийн мэндэлсний 80 жилийн ойг тохиолдуулан зохион байгуулсан гол арга хэмжээ Самжиён хотод болжээ.  "Ким Жөн Ирийн мэндэлсний 80 жилийн ойг тохиолдуулан зохион байгуулсан хүндэтгэлийн гол арга хэмжээ хоёрдугаар сарын 15-нд хувьсгалын ариун газар болох Самжиён хотод боллоо" гэж тус сонинд мэдээлсэн байна. Баярын арга хэмжээний үеэр хотод ёслолын буудлага буудуулж, концерт зохион байгуулжээ.

БНАСАУ-д Ким Жөн Ирийн мэндэлсэн өдөр буюу хоёрдугаар сарын 16-ны өдрийг “Гэрэлт одны өдөр” гэж нэрлэн, үндэсний баярын өдөр болгон зарласан юм. Уг баярыг тохиолдуулан уламжлал ёсоор тус улсын өнцөг булан бүрт босгосон Ким Жөн Ирийн хөшөөнд цэцэг өргөн, хүндэтгэл үзүүлдэг.

Самжиён хот нь ариун уул гэгддэг Пэктусаны ойролцоо оршдог. Албан ёсны мэдээллээр, Ким Жөн Ир 1942 оны хоёрдугаар сарын 16-нд энэ уулын бэлд партизаны хуаранд мэндэлжээ. БНАСАУ-ын одоогийн удирдагч Ким Жөн Ун ижил нэртэй хошуунд томоохон бүтээн байгуулалт явуулсан бөгөөд засаг захиргааны төв нь 2019 онд хотын статустай болсон байна.

Эх сурвалж: Montsame.mn 

Сэтгэгдэл (0)