Солонгос улс ASTRAZENECA компанитай гэрээ байгуулав

2020-12-14

БНСУ Их Британи, Шведийн хамтарсан био технологийн AstraZeneca компанийн боловсруулж буй КОВИД-19-ийн вакциныг худалдан авахаар гэрээ байгуулсан тухай эрүүл мэндийн байгууллагын ажилтан мэдэгдэв. Гэрээний нарийвчилсан мэдээлэл, санхүүгийн нөхцөл байдал, худалдан авах вакцины тунгийн хэмжээ зэргийг ил болгоогүй байгаа бөгөөд саяхан AstraZeneca-тай вакцин нийлүүлэх гэрээнд гарын үсэг зурсан хэмээн нэрээ нууцлахыг хүссэн албаны хүн мэдэгдэв.
БНСУ-ын Засгийн газар AstraZeneca-аас гадна Pfizer-BioNTech, Moderna, Johnson & Johnson, Novavax компанийн боловсруулж буй вакциныг худалдан авахаар хэлэлцээр хийж байна. AstraZeneca-ийн вакцин нь бусад ижил төрлийн компаниудын боловсруулж буй вакцинаас үнийн хувьд харьцангуй хямд бөгөөд 2-8 градусын дулаан хэмд удаан хадгалж болдгоороо ялгарч байна. Мөн энэ оны 7 дугаар сард Өмнөд Солонгосын SK группийн SK Bioscience компани AstraZeneca-ийн вакцин бэлэн болсны дараа дотооддоо үйлдвэрлэхээр гэрээ байгуулаад байгаа. 50 орчим сая хүн амтай БНСУ эхний ээлжид 30 сая хүнийг вакцинжуулах вакцины нөөцтэй болохоор төлөвлөж байсан ч Засгийн газраас оруулсан төсөвт 44 орчим сая хүнд хийх вакцины нөөц бүрдүүлэхээр 900 тэрбум вон /820 сая доллар/ зарцуулахаар болсон байна.

Эх сурвалж: ГАДААД ХАРИЛЦААНЫ ЯАМНЫ ГАДААД СУРТАЛЧИЛГАА СОЁЛЫН ГАЗАР

Сэтгэгдэл (0)