2022 онд яриа хэлэлцээ, хамтын ажиллагаагаа сэргээхийг БНАСАУ-д уриалав

2021-12-28

СӨҮЛ. /RT/. БНСУ-ын Улс орноо нэгтгэх яам БНАСАУ-д хандан 2022 оныг Сөүлтэй яриа хэлэлцээ хийх, хамтран ажиллахад чиглэсэн алхмаар эхлүүлэхийг уриалжээ.

Энэ тухай тус яамны төлөөлөгч Ли Жон Жү даваа гарагт хийсэн хэвлэлийн баг хурлын үеэр мэдэгджээ. “БНАСАУ шинэ онд дэлхийн хамтын нийгэмлэгтэй яриа хэлцээ хийх үүд хаалгыг нээж, хамтын ажиллагаагаа сэргээх алхам хийнэ гэж найдаж байна” гэж тэрбээр цохон тэмдэглэсэн байна. 

Умард Солонгосын эрх баригч Солонгосын Хөдөлмөрийн намын ээлжит их хурал 12 дугаар сарын сүүлийн арав хоногт болж, 2022 онд хийх ажлын төлөвлөгөөгөө хэлэлцэж шийдвэрлэнэ гэдгийг Ли Жон Жү дурджээ. Түүний хэлснээр, ийм хурал ихэвчлэн нэгээс дөрөв хоног үргэлжилдэг бөгөөд тус улсын удирдагч Ким Жөн Ун оролцдог.

"Солонгос хоорондын харилцаа, цөмийн хэлэлцээрийн талаар мэдэгдэл хийж магадгүй энэ үйл явдлыг Сөүл анхааралтай ажиглана" гэж Ли Жон Жү цохон тэмдэглэсэн байна.

2019 онд Ханойд болсон АНУ, БНАСАУ-ын удирдагчдын дээд хэмжээний уулзалт үр дүнгүй өндөрлөснөөс хойш БНАСАУ, БНСУ-ын харилцаа царцсан хэвээр байгаа юм. Үүнээс хойш Пёньян харилцаа холбоо, хамтын ажиллагаагаа сэргээх Өмнөдийн бүх саналыг няцаасаар иржээ.

Эх сурвалж: Montsame.mn 

Сэтгэгдэл (0)