БНСУ-д “омикрон” хувилбарын тохиолдол нэмэгдэж зарим журмаа чангатгалаа

2021-12-27

БНСУ-д өнөөдрийн байдлаар “COVID-19”-ийн “омикрон” хувилбарын 178 тохиолдол бүртгэгдээд байна. Үүнтэй холбоотойгоор тус улсын Засгийн газар хилийн чанадаас ирж буй иргэдийг 10 хоног тусгаарлах арга хэмжээг ирэх нэгдүгээр сарын 6-ны өдрийг хүртэл дахин гурван долоо хоног сунгах шийдвэр гаргажээ.

Ингэснээр дэлхийн бүх улсаас БНСУ-д ирж буй тус улсын иргэд болон байнга оршин суух зөвшөөрөлтэй гадаадын иргэд вакцинд хамрагдсан эсэхээс үл хамааран 10 хоног өөрийгөө тусгаарлах болж байна. Түүнчлэн богино хугацааны визтэй гадаадын иргэдийг нэг хоног тусгаарлах байранд тусгаарлаж, хилээр нэвтрэхээс өмнө болон дараа, тусгаарлалтаас гарах өдөр зэргээр нийт гурван удаа коронавирусний шинжилгээнд хамруулахаар болжээ.  

Засгийн газар 12 дугаар сарын 6-ны өдрөөс ирэх оны нэгдүгээр сарын 2-ны өдөр хүртэлх хугацаанд Сөүл хотын дотор хувийн уулзалтад оролцох хүмүүсийн тоог зургаа, хот орчимд найман хүн, саун, уушийн газар, биеийн тамирын заал зэрэг халдварын өндөр эрсдэлтэй газарт үйлчлүүлж буй хүмүүс вакцинд хамрагдсан эсвэл шинжилгээний хариу сөрөг гарсан гэдгийг вакцины үнэмлэх, цахим хавстралтаар нотлох зохицуулалтыг хийсэн юм. 

Гэвч улсын хэмжээнд “COVID-19”-ийн тохиолдол, нас барсан тохиолдлын тоо буурахгүй байгаа тул 12 дугаар сарын 18-ны өдрөөс халдвар хамгааллын шинэ журмыг мөрдөж эхлээд байна. Уг журамд зааснаар, хувийн уулзалтад дөрвөн хүн оролцох, вакцинд бүрэн хамрагдсан иргэд зоогийн газар, кафегаар үйлчлүүлэх, вакцинд хамрагдаагүй хүмүүс дангаараа эсвэл хүргэлтээр үйлчлүүлэх, ресторан, уушийн болон цэнгээний газар, бусад үзвэр үйлчилгээний газрууд 21:00 цаг хүртэл ажиллахаар тусгажээ. Кинотеатр, концертын танхим, интернет кафе 22 цаг хүртэл ажиллах юм.

Харин вакцины хувьд БНСУ-ын Засгийн газраас гадаад улсад хийлгэсэн БНХАУ, ОХУ-д үйлдвэрлэсэн вакциныг хүлээн зөвшөөрөхгүй гэж мэдэгдэж байсан боловч тус улсад суугаа цөөнгүй орны Дипломат төлөөлөгчийн газраас эсэргүүцэл илэрхийлсэн тул БНХАУ-д үйлдвэрлэсэн вакцинд хамрагдсан хүмүүсийг цахимд бүртгэж, ОХУ-ын “Спутник” вакцин тариулсан хүмүүсийг бүртгэхгүйгээр, вакцинжуулалтын 1, 2-р тунд дахин хамрагдахыг мэдэгдээд байна.  

БНСУ-ын Хөдөлмөр, ажил эрхлэлтийн яамнаас бямба гарагт “COVID-19”-өөс шалтгаалан ажиллах хүчний хомсдолыг шийдвэрлэх зорилгоор 2022 оны нэгдүгээр сарын 1-ний өдрөөс 2022 оны дөрөвдүгээр сарын 12-ны хооронд тус улсад оршин суух хугацаа нь дуусах E-9 (мэргэжилгүй гэрээт ажилчин), H-2 (хувийн урилгаар хөдөлмөр эрхлэгч) гадаадын 40 мянган иргэний визний хугацааг дууссан өдрөөс эхлэн нэг жилийн хугацаагаар сунгахаар төлөвлөж буйгаа мөн мэдэгдлээ. Тус улс коронавирусний “омикрон” хувилбараас шалтгаалан гадаадаас ажиллах хүч авахаа хойшлуулаад байна. 

БНСУ-д “COVID-19” цар тахлаас урьдчилан сэргийлэх вакцины нэгдүгээр тунд нийт хүн амын 94.7 хувь, хоёрдугаар тунд 92.6 хувь, нэмэлт тунд 22.6 хувь нь хамрагдсан байна.  

Эх сурвалж: Montsame.mn 

Сэтгэгдэл (0)