Австрали вакцинд хамрагдсан өмнөд солонгосчуудад хилээ нээжээ

2021-12-22

СӨҮЛ. /Yonhap/. Австрали зорчих хөдөлгөөний хязгаарлалтуудыг үе шаттайгаар цуцлах шийдвэрийнхээ хүрээнд лхагва гаргаас эхлэн “COVID-19”-ийн вакцинд бүрэн хамрагдсан БНСУ-ын иргэдийг хилээрээ нэвтрүүлж эхэлсэн талаар Австралиас Сөүлд суугаа Элчин сайд мэдээлжээ. 

Австрали улс нь 2020 оны гуравдугаар сард “COVID-19” цар тахлын улмаас гадаадын иргэдийг хилээрээ нэвтрүүлэхийг хориглосноосоо хойш анх удаа Солонгосын иргэдэд хилээ нээж буй нь энэ юм. 

“Өнөөдрөөс эхлэн БНСУ-ын вакцинд хамрагдсан иргэд Австралийн тодорхой муж, бүс нутаг руу зөвшөөрөл хүсэхгүйгээр зорчих боломжтой болж байна” гэж Австралиас Сөүлд суугаа төлөөлөгч Катерина Рэпер “Twitter” хуудсаараа дамжуулан мэдэгджээ. 

Үүнд, Шинэ Өмнөд Уэльс, Викториа, Австралийн нийслэлийн бүс багтах ажээ. Сөүлийн төлөөлөгчдийн мэдээлснээр, вакцинд бүрэн хамрагдсан иргэд БНСУ-аас шууд нислэгээр Австралид очих боломжтой байна. Ийнхүү зорчигчдод 24 цагийн дотор өгсөн “PCR” шинжилгээний хариугаа үзүүлэх, гурван хоног өөрийгөө тусгаарлах шаардлага тавина. 

БНСУ-ын Ерөнхийлөгч Мүн Жэ Иний Австралид хийсэн төрийн айлчлалын сүүлийн өдөр энэхүү мэдэгдлийг хийсэн юм. Айлчлалын хугацаанд хоёр орны эрх баригчид хоёр талын харилцааг иж бүрэн стратегийн түншлэлийн түвшинд хүргэн ахиулж, хамтын ажиллагаагаа олон салбарт өргөжүүлэхээр тохиролцсон билээ.

Эх сурвалж: Montsame.mn 

Сэтгэгдэл (0)