Сөүл, Пёньян, Вашингтон, Бээжин Солонгосын дайн дууссаныг зарлахад бэлэн байна

2021-12-14

СИДНЕЙ. /TASS/. БНСУ, БНАСАУ, АНУ болон БНХАУ Солонгосын дайн (1950-1953) дууссаныг албан ёсоор зарлахад бэлэн байгаа тухай БНСУ-ын Ерөнхийлөгч Мүн Жэ Ин даваа гарагт Австралийн Ерөнхий сайд Скотт Моррисонтой хэлэлцээ хийснийхээ дараа сэтгүүлчдийн асуултад хариулахдаа мэдэгдэв.

“Австрали улс Солонгосын хойгийн байдлыг тайван замаар зохицуулах үйл явцыг тууштай дэмжсээр ирсэн. Үүний төлөө бид Австралид талархаж байна. Тус улс мөн дайн дууссаныг зарлах тухай Өмнөд Солонгосын Засгийн газар болон бусад талуудын, тодруулбал, АНУ, БНХАУ, БНАСАУ-ын саналыг дэмжсэн. Дайн дууссан тухай тунхаглалыг зарчмын хувьд бүгд хүлээн зөвшөөрч байгаа гэж би бодож байна" гэж тэрбээр хэлжээ.

Түүний хэлснээр, АНУ-ын бодлогыг дайсагнасан гэж үзэж буй Пёньяны байр сууринаас болж талууд өнөөг хүртэл хэлэлцээний ширээний ард сууж чадахгүй байгаа аж.

БНСУ-ын Ерөнхийлөгч Мүн Жэ Ин Солонгосын дайн дууссан тухай тунхаглалд аль болох түргэн гарын үсэг зурахыг НҮБ-ын Ерөнхий Ассамблейн 76 дугаар чуулганы хуралдааны үеэр уриалсан юм. Солонгосын дайн буюу БНАСАУ /Умард Солонгос/, БНСУ-ын /Өмнөд Солонгос/ хооронд болсон зэвсэгт мөргөлдөөн 1950 оны зургаадугаар сарын 25-нд эхэлж, 1953 он хүртэл үргэлжилсэн юм. Энэ дайнд Өмнөд Солонгосыг АНУ ба өрнөдийнхөн, Умард Солонгосыг ЗХУ, БНХАУ зэрэг коммунист орнууд дэмжиж байсан бөгөөд талуудын хооронд түр эвлэрэх гэрээ байгуулсан учир одоог хүртэл албан ёсоор дуусаагүй байгаа билээ.

Эх сурвалж: Montsame.mn 

Сэтгэгдэл (0)