БНАСАУ Хятадтай худалдаагаа сэргээхээр төмөр замын байгууламж барьж байна

2021-11-17

ЛОНДОН. /Financial Times/. БНАСАУ хилийнхээ ойролцоох нисэх баазыг төмөр замаар тээвэрлэдэг чингэлгийг халдваргүйжүүлэх байгууламж болгон хувиргаж байна гэж “Financial Times” сонин Америкийн стратеги, олон улсын судалгааны төвийн мэдээллээс (Center for Strategic and International Studies, CSIS) эш татан мэдээлжээ. 

Уг байгууламжийг Хятадтай худалдаагаа сэргээхээр өөрчилж байгаа бололтой гэж тус сонинд бичсэн байна. БНАСАУ Хятадтай залгаа хилийн ойролцоо ийм төсөл хэрэгжүүлж байгаа нь "эдийн засгийн дарамт шахалт Пёньяныг цөмийн хөтөлбөрийнх нь асуудлаарх хэлэлцээний ширээний ард суухаас аргагүйд хүргэнэ гэсэн АНУ-ын итгэл найдварыг тасалдуулахад" хүргэж болзошгүй гэж тус сонинд онцлон тэмдэглэсэн байна.

БНАСАУ коронавирусний цар тахлын улмаас 2020 оны нэгдүгээр сард Хятад, Оростой хуурай газрын хилээ хаасан юм. 

Нөхцөл байдал хүнд байгаа тул Пёньян "ядаж л тодорхой хэмжээний худалдаа явуулахын тулд чадах бүхнээ хийж байна" гэж CSIS-ийн төлөөлөгч ярьжээ. БНАСАУ-ын эрх баригчид импортын бараа бүтээгдэхүүнийг халдваргүйжүүлэх тухай хууль баталсны дараа хилийн ойролцоох баазыг дахин тоноглох ажлыг гуравдугаар сард эхлүүлсэн байна.

Хятадтай хэдэн сарын өмнөөөс далайн тээврээр худалдаа хийж эхэлсэн боловч төмөр замын тээвэр нээгдсэнээр “импортын хэмжээ их хэмжээгээр нэмэгдэнэ” гэж тус сонинд бичжээ.

Эх сурвалж: Montsame.mn 

Сэтгэгдэл (0)