БНСУ-ын компаниуд хагас дамжуулагчийн үйлдвэрлэлийнхээ мэдээллийг АНУ-д өгчээ

2021-11-10

СӨҮЛ. /TASS/. БНСУ-ын “Samsung Electronic”, “SK Hynix” компаниуд худалдааны гол нууцыг задруулалгүйгээр хагас дамжуулагчийн үйлдвэрлэлийнхээ талаарх мэдээллийг АНУ-ын эрх баригчдад өгсөн тухай "KBS" телевиз мэдээлжээ. 

АНУ-ын эрх баригчид өмнө нь хагас дамжуулагч болон автомашины томоохон үйлдвэрлэгчдээс дэлхийн даяар үүссэн хагас дамжуулагчийн хомсдолыг шийдвэрлэхэд хувь нэмрээ оруулж, бизнесийн мэдээллээ сайн дураар хуваалцахыг хүсжээ. "KBS" телевизээр мэдээлснээр, Өмнөд Солонгосын дээрх хоёр компани “холбогдох газруудтай нарийн зөвлөлдсөний дараа үйлчлүүлэгчид, борлуулалт болон нөөцийнхөө талаарх нууц мэдээллийг өгөхөө багасгасан байна”.

“Samsung Electronics”, “SK hynix” компаниуд нийлээд дэлхийн чипний зах зээлийн 70 гаруй хувийг эзэлдэг байна.

Өнгөрсөн долоо хоногт БНСУ, АНУ-ын эрх баригчид салбарын яамдын газрын дарга нарын түвшинд яриа хэлэлцээний шинэ суваг бий болгож, хагас дамжуулагчийн нийлүүлэлтийн асуудлыг тогтмол хэлэлцэхээр шийджээ.

Эх сурвалж: Montsame.mn 

Сэтгэгдэл (0)