БНСУ дахь Монгол эмэгтэйчүүдийн нэгдсэн холбооны 11 жилийн ойн арга хэмжээ болжээ

2021-11-01

ТӨВИЙН ДАРГА Д.БАЯРМАНДАХ БНСУ ДАХЬ МОНГОЛ ЭМЭГТЭЙЧҮҮДИЙН НЭГДСЭН ХОЛБООНЫ 11 ЖИЛИЙН ОЙН АРГА ХЭМЖЭЭНД УРИЛГААР ОРОЛЦОЖ БАЯР ХҮРГЭЛЭЭ

Өнгөрсөн долоо хоногийн бямба гарагт буюу 10 дугаар сарын 30-ны өдөр Солонгост оршин суугаа монголчуудын хувьд нэгэн тэмдэглэлт өдөр тохиосон нь БНСУ дахь Монгол эмэгтэйчүүдийн нэгдсэн холбооны 11 жилийн ойн арга хэмжээ байлаа. Тус арга хэмжээнд БНСУ-д Монгол Улсаас суугаа Онц бөгөөд бүрэн эрхт элчин сайд Н.Эрдэнэтуяа, ХНХЯ-ны харьяа БНСУ дахь ХНХҮТ-ийн дарга Д.Баярмандах нарын албаны хүмүүс урилгаар оролцож баяр хүргэлээ. ХНХҮТ-ийн дарга Д.Баярмандах хэлсэн үгэндээ “ХНХЯ-ны эрхлэх асуудлын чиг үүргийн дагуу хүн амын хөгжил, хүүхэд, гэр бүл, залуучуудын хөгжил, мөн хөгжлийн бэрхшээлтэй иргэд, аутизмтай хүүхдүүд рүү чиглэсэн олон талт сайн үйлсийн ажлуудыг санаачлан хэрэгжүүлдэг, бидэнтэй хамтран ажилладаг тус холбооны түүхэн ой тохиож байгаад халуун баяр хүргэхийн ялдамд бидний цаашдын хамтын ажиллагаа улам бэхжиж, хүрээгээ тэлж өргөжих болно гэдэгт итгэлтэй байна” хэмээсэн билээ.

БНСУ дахь Эмэгтэйчүүдийн нэгдсэн холбоо нь Солонгос улсад үйл ажиллагаа явуулдаг төрийн бус байгууллагуудын анхдагч нь бөгөөд Хөдөлмөр, нийгмийн хамгааллын үйлчилгээний төвтэй хэд хэдэн томоохон ажил, арга хэмжээг амжилттай хамтран хэрэгжүүлж ирсэн ажил хэрэгч, бүтээлч, санаачлагч, сайн үйлсийг түгээн дэлгэрүүлэгч байгууллага юм.

Эх сурвалж: БНСУ дахь Хөдөлмөр, нийгмийн хамгааллын үйлчилгээний төв

 

Сэтгэгдэл (0)