Хонг Нам Ки “Хорийн бүлэг”-ийн Сангийн сайд нарын уулзалтад оролцохоор АНУ-ыг зорино

2021-10-25

СӨҮЛ. /Yonhap/. БНСУ-ын Сангийн сайд Хонг Нам Ки дэлхийн эдийн засаг, санхүүгийн асуудлуудыг хэлэлцэх “Хорийн бүлэг”-ийн орнуудын Сангийн сайд, Төв банкны тэргүүн нарын уулзалтад оролцоно гэж БНСУ-ын Эдийн засаг, сангийн яамнаас өнөөдөр мэдээлжээ.  

Тус яамны мэдээлэлд дурдсанаар, Сангийн сайд Хонг Нам Ки мягмар гарагт АНУ-ын нийслэл Вашингтон хотод айлчилж, “Хорийн бүлэг”-ийн орнуудын Сангийн сайд, Төв банкны тэргүүн нарын лхагва гарагт болох уулзалтад оролцохоор болсон байна.

Хонг Нам Ки бодлогын уялдаа холбоо шаардлагатай байгаа болон дэлхийн эдийн засгийн эрсдлийн эсрэг чөлөөт худалдааг дэмжихийн чухлыг онцлон тэмдэглэх төлөвтэй байна гэж Эдийн засаг, сангийн яамны мэдээлэлд онцолжээ. Тэрээр мөн цаг уурын өөрчлөлтийн эсрэг хариу арга хэмжээ авах, дэлхийн аж ахуйн нэгжийн татварын тогтолцоог өөрчлөх талаар БНСУ-ын байр суурийг илэрхийлэхээ мэдэгджээ.

Түүнчлэн ОУВС-гийн Олон улсын валют-санхүүгийн хорооны /ОУВСХ/ пүрэв гарагт болох хуралд оролцож, цар тахлын үед ОУВС-гийн гүйцэтгэх үүргийг хэлэлцэнэ.

Мөн БНСУ-ын Сангийн сайд Хонг Нам Ки АНУ-ын Сангийн сайд Жанет Йеллен, Аргентины Сангийн сайд нартай тусдаа хэлэлцээ хийхээр товложээ.

Үүний зэрэгцээ түүнийг ОУВС, Дэлхийн банк, Америк Хоорондын Хөгжлийн Банкны тэргүүнүүдтэй уулзана гэж тус яамнаас мэдээлжээ. 

Эх сурвалж: Montsame.mn 

Сэтгэгдэл (0)