БНСУ-д зай барих журмыг сунгана

2021-10-01

СӨҮЛ. /Yonhap/. БНСУ-д бүх нийтийн амралтын өдрүүдээр “COVID-19” халдварын шинэ тохиолдлын тоо эрс нэмэгдэж болзошгүй байгаатай холбогдуулан хүн хоорондын зай барих хатуу журмын орон даяар мөрдөх хугацааг дахин хоёр долоо хоногоор сунгана гэж тус улсын Ерөнхий сайд Ким Бу Кюм өнөөдөр мэдэгдлээ.

Ирэх даваа гаргаас хэрэгжих шинэчилсэн төлөвлөгөөний дагуу Сөүл хотын бүсэд зай барих хамгийн өндөр буюу дөрөвдүгээр түвшний журмыг баримтлах бол бусад бүс нутагт гуравдугаар түвшний хязгаарлалтуудыг үргэлжлүүлэн мөрдөх шаардлагатай ажээ.

Харин нийслэлийн бүс дэх кафе, зоогийн газруудыг оройн 22 цаг хүртэл үйл ажиллагаагаа явуулахыг зөвшөөрнө. Мөн оройн 18 цагаас хойш зургаа хүртэлх хүн нэг дор цуглахыг зөвшөөрөх бөгөөд тэдний дөрөв нь вакцинд бүрэн хамрагдсан байх шаардлагатай байна.

Цар тахлын дөрөв дэх давлагаанд нэрвэгдээд буй БНСУ-д өнгөрсөн долоо хоногт болсон Ургацын баярын дараа халдварын нөхцөл байдал улам хүндэрчээ. Хэдийгээр халдварын тархалтыг сааруулахын тулд орон даяар хязгаарлалтын арга хэмжээнүүдийг мөрдөж байгаа ч өдөрт илэрсэн халдварын тохиолдлын тоо 86 хоногийн турш 1000 даваад байна.

Мөн удахгүй болох тэмдэглэлт өдрүүдийн амралтын үеэр халдварын шинэ тохиолдлын тоо дахин нэмэгдэж болзошгүйд эрүүл мэндийн байгууллагын мэргэжилтнүүд ихээхэн санаа зовниж байна. БНСУ-д 10 дугаар сарын 3-нд улс байгуулагдсан өдөр, 10 дугаар сарын 9-нд Хангыль үсгийн баяр тохиодог. 

Эх сурвалж: Montsame.mn 

Сэтгэгдэл (0)