БНСУ, Монгол Улс хоёр талын харилцааг “стратегийн түншлэл”-ийн түвшинд хүргэн ахиулна

2021-09-13

СӨҮЛ. /Yonhap/. БНСУ-ын Ерөнхийлөгч Мүн Жэ Ин, Монгол Улсын Ерөнхийлөгч У.Хүрэлсүх нар дээд түвшний цахим уулзалтынхаа үеэр хоёр талын харилцааг “стратегийн түншлэл”-ийн түвшинд хүргэн ахиулахаар тохиролцлоо гэж Хөх ордон мэдээлэв.

 

Мүн Жэ Ин, У.Хүрэлсүх нар хоёр талын харилцааг цаашид олон салбарт бэхжүүлэх тодорхой арга замуудыг тусгасан хамтарсан тунхаглал гаргажээ.

Нэг цагийн турш үргэлжилсэн яриа хэлэлцээний үеэр удирдагчид хоёр орон 1990 онд албан ёсоор дипломат харилцаа тогтоосноос хойш улс төр, эдийн засаг, соёл, ард түмний харилцаа найрсгаар хөгжсөөр ирснийг цохон тэмдэглэсэн байна.

“Талууд өнөөгийн хүрээд буй ололт амжилтдаа тулгуурлан хоёр талын харилцааг стратегийн түншлэлийн түвшинд хүргэн ахиулахаар тохиролцлоо” гэж Мүн Жэ Иний ажлын албанаас мэдээлжээ. 2011 онд хоёр орон албан ёсны харилцаагаа “иж бүрэн түншлэл”-ийн түвшинд хүргэсэн билээ.

Монгол Улс нь умардын орнуудтай стратегийн харилцаагаа сайжруулах зорилго бүхий БНСУ-ын Умардыг чиглэсэн шинэ бодлогын гол түнш бөгөөд Мүн Жэ Иний 2020 оны есдүгээр сард анхлан дэвшүүлж, түүнээс гурван сарын дараа хэрэгжиж эхэлсэн Халдварт өвчнийг хянах, нийгмийн эрүүл мэндийг хамгаалах Зүүн Хойд Азийн хамтын ажиллагааны санаачилгыг идэвхтэй дэмжсээр ирсэн юм.

Мөн БНСУ коронавирусний цар тахлаас ангижирсны дараах үед Монгол Улстай хамтын ажиллагаагаа бэхжүүлнэ гэдэгт найдаж буйг Мүн Жэ Ин илэрхийлжээ.

Тэрбээр үйлдвэрлэлийн томоохон орон болох БНСУ, байгалийн арвин баялагтай Монгол Улсын хувьд хамтран ажиллах нөөц бололцоо их байгааг онцлон тэмдэглэсэн байна.

Үүний зэрэгцээ ногоон эрчим хүч тэргүүтэй байгаль орчинд ээлтэй үйлдвэрлэлийг хөгжүүлэх чиглэлд хамтын ажиллагаагаа үргэлжлүүлэн өргөжүүлэх санал тавив.

Монгол Улсын Ерөнхийлөгчийн хувьд, Монголын байгальд ээлтэй дэд бүтцийн хөгжил, баялгийн бүтээн байгуулалтад БНСУ-ын дэвшилтэт технологийг нэвтрүүлснээр хамтын үр дүнд хүрэх боломжтойд санал нэгджээ.

Ийнхүү талууд эрүүл мэндийн тусламж, эмнэлгийн үйлчилгээ, байгаль орчин, шинжлэх ухаан технологийн салбарт нягт хамтран ажиллахаар тохиролцсон байна.

Мөн Монголд эрчим хүч нийлүүлэх, ухаалаг хот байгуулах, нийлүүлэлт-логистикийн систем байгуулахад БНСУ-ын компаниудын оролцоог дэмжихээр тохиролцжээ.

Монгол Улсын Ерөнхийлөгч зургаадугаар сард сонгогдсоноос хойш талууд анх удаа яриа хэлэлцээ хийж буй нь энэ юм. У.Хүрэлсүх өмнө нь 2018 оны нэгдүгээр сард Ерөнхий сайдын хувиар БНСУ-д айлчлах үеэрээ Мүн Жэ Интэй уулзсан билээ. 

Эх сурвалж: Montsame.mn 

Сэтгэгдэл (0)