БНАСАУ цэргийн парад зохион байгуулах төлөвтэй байна

2021-09-08

СӨҮЛ. /Yonhap/. БНАСАУ улс байгуулагдсаны ойгоо тохиолдуулан энэ долоо хоногт цэргийн парад зохион байгуулахаар бэлтгэж байгаа бололтой байна гэж цэргийн эх сурвалжууд өнөөдөр мэдээлжээ.

Саяхан Пёньян хотод 10 мянга орчим цэрэг харагдсантай холбоотойгоор есдүгээр сарын 9, 10 дугаар сарын 10-нд болох улс, нам байгуулагдсаны ойг тохиолдуулан цэргийн парад хийхээр бэлтгэж байж магадгүй хэмээн таамаглаж байсан юм. 

Олон эх сурвалжийн мэдээлснээр, бэлтгэлийн байдлаас нь үзэхэд парадыг энэ долоо хоногийн пүрэв гарагт болох улс байгуулагдсаны ойн өдөр зохион байгуулах магадлал өндөр байна. 
Энэхүү үйл ажиллагааг өмнөх парадуудын нэгэн адил оройн цагаар зохион байгуулж магадгүй байгааг нэгэн төлөөлөгч мэдээлжээ. Мөн БНАСАУ парадынхаа үеэр БНСУ, АНУ-д өгөх дохиогоо үзүүлж магадгүй хэмээн нэмж хэлсэн байна.

“БНСУ, АНУ-ын тагнуулын газруудын хамтын ажиллагааны хүрээнд манай цэргийнхэн БНАСАУ-ын цэргийн парад гэх мэт өргөн хүрээг хамарсан үйл ажиллагааны бэлтгэлийг тэмдэглэлт өдрүүдтэй нь уялдуулан нягт ажиглаж байна” гэж БНСУ-ын Штабын дарга нарын хорооны хэвлэлийн төлөөлөгч Ким Жун Рак хэвлэлийн бага хурлын үеэр мэдээлжээ.

БНАСАУ өнгөрсөн сард БНСУ-АНУ-ын явуулсан хамтарсан цэргийн сургуулилалтыг эрс эсэргүүцэж буйгаа илэрхийлэх үеэрээ “аюулгүй байдлын ноцтой хямралын” талаар анхааруулсны дараа цэргийн парад зохион байгуулах төлөв ажиглагдаад буй нь энэ юм.  

Өнгөрсөн оны 10 дугаар сард БНАСАУ улс байгуулагдсаны 75 жилийн ойгоо тохиолдуулан томоохон цэргийн парад зохион байгуулж, тив хоорондын шинэ баллистик пуужин, шумбагч онгоцноос харвах баллистик пуужин зэрэг цэргийн дэвшилтэт техник хэрэгслүүдээ үзүүлсэн билээ. 

Эх сурвалж: Montsame.mn 

Сэтгэгдэл (0)