БНСУ-д зай барих журмыг сунгана

2021-09-03

СӨҮЛ. /Yonhap/. БНСУ-д ургацын баярын үеэр халдварын үзүүлэлтүүд нэмэгдэж болзошгүй байгаатай холбогдуулан хүн хоорондын зай барих хатуу журмын орон даяар мөрдөх хугацааг дахин нэг сараар сунгана гэж тус улсын Ерөнхий сайд Ким Бу Кюм өнөөдөр мэдэгдлээ.

Ирэх даваа гаргаас 10 дугаар сарын 3 хүртэл хэрэгжих шинэчилсэн төлөвлөгөөний дагуу Сөүл хотын бүсэд зай барих хамгийн өндөр буюу дөрөвдүгээр түвшний журмыг баримтлах бол бусад бүс нутагт гуравдугаар түвшний хязгаарлалтуудыг мөрдөх шаардлагатай ажээ.

Харин нийслэлийн бүс дэх кафе, зоогийн газруудыг одоогоор оройн 21 цаг хүртэл үйл ажиллагаагаа явуулахыг зөвшөөрч байгаа бол ирэх сард 22 цаг хүртэл ажиллахыг зөвшөөрнө.

Зай барих шинэ журмын дагуу нийслэлийн бүсэд оройн 18 цагаас өмнө зургаа хүртэлх хүн нэг дор цуглахыг зөвшөөрөх бөгөөд тэдний хоёр нь вакцинд бүрэн хамрагдсан байх шаардлагатай бол оройн 18 цагаас хойш уулзах зургаан хүний дөрөвт нь вакцинд бүрэн хамрагдсан байх шаардлага тавина.

Мөн гуравдугаар түвшний хязгаарлалт тогтоосон бүс нутгуудад найман хүн нэг дор цуглахыг зөвшөөрөх бөгөөд тэдний дор хаяж дөрөв нь вакцины бүрэн тунд хамрагдсан байх хэрэгтэй гэж Ерөнхий сайд хэлжээ. 
Түүний мэдээлснээр, Засгийн газар энэ сарын 21-нд болох ургацын баяраас өмнө хүн амын 70 хувийг “COVID-19”-ийн вакцины эхний тунд хамруулах зорилтдоо хүрэхэд хангалттай хүрэлцэх хэмжээний вакцины нөөцтэй болжээ.

БНСУ-д сүүлийн 24 цагийн хугацаанд “COVID-19” халдварын 1709 тохиолдол илэрчээ. Ингэснээр улсын хэмжээнд өдөрт илэрсэн халдварын шинэ тохиолдлын тоо сүүлийн хоёр сар орчмын турш 1000 даваад байна. 

Эх сурвалж: Montsame.mn 

Сэтгэгдэл (0)