БНСУ-ын өмнөд нутгийг “Омайс” шуурга дайран өнгөрчээ

2021-08-24

СӨҮЛ. /Yonhap/. БНСУ-ын өмнөд нутгийн хотуудыг “Омайс” далайн шуурга дайран өнгөрсний улмаас даваа гаргийн шөнө дунд хөрсний гулгалт үүсэж, зам, барилгууд үерийн усанд автаж, 10 мянга гаруй хүнийг нүүлгэн шилжүүлэхэд хүрчээ.

Шуурганы хүч өнөө өглөө суларсантай холбоотойгоор өмнөх өдөр гаргасан шуурганы анхааруулгуудыг бүгдийг нь цуцлаад байгаа боловч өнөөдөр эргийн бүс нутгууд, улсын өмнөд хэсгээр хүчтэй салхи салхилж, аянга цахилгаан цахиж, 200 мм хүртэлх хур тунадас орох төлөвтэй байгааг цаг уурын албанаас сэрэмжлүүлсэн байна.

Энэ улиралд дайран өнгөрсөн анхны далайн шуурганы улмаас хүчтэй аадар бороо орж, салхины хурд 18-19 м/сек-д хүрч, агаарын даралт 996 гектопаскаль болжээ. Мөн Жежү аралд 219.5 мм, Сачеон хотод 205.5 мм, Гоже хотод 184 мм, Өмнөд Гёнсан муж, Бусан хотод тус бүр 159 мм хур тунадас унасан байна.

Гал сөнөөгчид үерийн аюулаас 11 хүнийг аварсан бөгөөд мягмар гаргийн өглөөний байдлаар хэн нэгэн хүн гэмтэж бэртсэн тухай мэдээлэл байхгүй гэж Байгалийн гамшгийн уршгийг арилгах төвөөс мэдээлжээ. Харин хөрсний гулгалт, үерийн аюулаас сэрэмжлэх үүднээс Өмнөд Гёнсан мужийн Тонгён хотод 10 хүнийг, зүүн нутгийн Бусан, Чанвон хот, Өмнөд Жёлла мужид 1106 хүнийг нүүлгэн шилжүүлжээ. 

Эх сурвалж: Montsame.mn 

Сэтгэгдэл (0)