Сөүл-Улаанбаатар нислэгтэй холбоотой мэдээлэл

2021-08-19

СӨҮЛ-УЛААНБААТАР НИСЛЭГТЭЙ ХОЛБООТОЙ МЭДЭЭЛЭЛ -

• Иргэний нисэхийн ерөнхий газраас баталсан Сөүл-Улаанбаатар чиглэлд 9 дүгээр сард үйлдэгдэх нислэгийн хуваарийг хавсралт зурган файлаас шалгана уу.

НИСЛЭГТ ХАМРАГДАХ ИРГЭДИЙН АНХААРАХ ЗҮЙЛС:

- КОРОНАВИРУСЫН ШИНЖИЛГЭЭ ӨГӨХ ТУХАЙ –

• Зорчигчид нислэгийн өдрөөс өмнө 72 цагийн дотор КОВИД-19-ийн “PCR” буюу полимеразийн гинжин урвал (ПГУ)-ын шинжилгээ өгч, хариу нь “сөрөг” гарсан шинжилгээний хариуг хэвлэж, биедээ авч явна. /0-5 насны хүүхэд хамаарахгүй/

• Коронавирусын шинжилгээний хариуг албан ёсны хэвлэмэл хуудсаар гаргах боломжтой эрүүл мэндийн төв, эмнэлгүүдэд шинжилгээг хийлгэсэн байна. Шинжилгээний бичигт тухайн иргэний овог, нэр, хүйс, төрсөн огноо зэрэг мэдээлэл зайлшгүй бичигдсэн байна.

• Гар утсандаа шинжилгээний хариуг мессежээр авсан тохиолдолд "screen shot" хийж хэвлэсэн байна.

Иргэдийн шинжилгээний хуудсыг нислэгийн бүртгэл хийгдэх үед шалгах ба шинжилгээний бичиггүй иргэнийг агаарын хөлөгт суулгахгүй болохыг анхаарна уу.

- ТУСГААРЛАЛТЫН ТУХАЙ –

“Тусгаарлан ажиглах үйл ажиллагааг зохицуулах түр журам”-ын дагуу хилийн чанадаас иргэдээ татан авах ажиллагаатай холбоотой дараах зохицуулалтыг мөрдөж байна.

• Гадаад улсаас ирж байгаа Коронавируст халдвар (КОВИД-19)-ын эсрэг вакцинд хамрагдаагүй, вакцины бүрэн тун хийлгээгүй хүнийг тусгаарлан ажиглах байранд 7 хоног тусгаарлаж, 3 болон 6 дахь хоногт “PCR”-ын шинжилгээ авна.

• Эмнэлзүйн шинж тэмдэг илрээгүй, 2 удаагийн “PCR”-ын шинжилгээний хариу “сөрөг” гарсан тохиолдолд тусгаарлалтыг дуусгана.

• Коронавируст халдвар (КОВИД-19)-ын эсрэг вакцины бүтэн тун хийлгэснээс хойш 14 хоногийн хугацаа өнгөрсөн, эсхүл улсын хилээр нэвтрэхээс сүүлийн 4 сарын хугацаанд коронавируст халдвар авч эдгэрсэн /нотлох баримт бичигтэй/ зорчигчдыг гэрийн 14 хоногийн ажиглалтад шилжүүлнэ.

• Коронавируст халдварын эсрэг вакцины бүрэн тун авснаас хойш 14 хоногийн хугацаа өнгөрсөн, эсхүл улсын хил нэвтрэхээс сүүлийн 4 сарын хугацаанд коронавируст халдвар авч эдгэрсэн /нотлох баримт бичигтэй/ гэрийн 14 хоногийн ажиглалтад шилжиж буй зорчигчоос (0-5 насны хүүхэд хамаарахгүй) Монгол Улсын агаарын болон авто замын хилийн боомтод "PCR" /ПГУ/ шинжилгээ авна.

• Гэрийн 14 хоногийн ажиглалтад шилжиж байгаа зорчигчид агаарын болон авто замын хилийн боомтод "PCR" /ПГУ/ шинжилгээ өгөхдөө гэрийн ажиглалтад байх оршин суух хаяг болон холбоо барих утасны дугаарыг үнэн зөв бүртгүүлнэ.

- ХУУЛЬ БУСААР ОРШИН СУУГАА ИРГЭД ИММИГРЕЙШНД БҮРТГҮҮЛЭХ ТУХАЙ -

• БНСУ-д хууль бусаар оршин сууж байгаа гадаад иргэн сайн дураар нутаг буцах тохиолдолд харьяа орон нутгийн Гадаадын иргэн харьяатын албанд ажлын 3-15 хоногийн өмнө өөрийн биеэр очиж зөрчил, гэмт хэрэгт холбогдож байсан эсэхийг шалгуулсны дараагаар хилээр гарах журамтай тул нислэгийн өмнө бүртгэлээ заавал хийлгэнэ үү.

• Сайн дураар нутаг буцах хүсэлт /자진출국/-ийг харьяа ГИХГ /immigration/-т ажлын 4-өөс доошгүй хоногийн өмнө гаргана. Сайн дураар нутаг буцах хүсэлтийн хүчинтэй хугацаа 30 хоног байх ба энэ хугацаанд тусгай үүргийн нислэгт хамрагдаж чадаагүй тохиолдолд хүчинтэй хугацаа дуусахаас өмнө харьяа ГИХГ-т очиж дахин сунгуулна.

• Сайн дураар нутаг буцах хүсэлт гаргасан иргэд нислэг үйлдэгдэх өдөр нислэгийн бүртгэл эхлэхээс 2-3 цагийн өмнө Инчон ОУНБ-д очиж онгоцны буудлын ГИХГ-т сайн дураар нутаг буцах хүсэлт гаргасан бичиг болон нислэгийн тийзийн хамт бүртгүүлж тэмдэглэгээ хийлгэж, шалгуулна.

• БНСУ-д төрсөн оршин суух визгүй хүүхдийн хувьд /эцэг эх нь оршин суух визтэй ч суугаа орны ГИХГ-т бүртгэгдээгүй хүүхэд мөн хамаарна/ эмнэлгийн төрсний тодорхойлолт /출생진단서/, гадаад паспорт, эцэг эхийн гадаад паспортын хамт ГИХГ-т бүртгүүлж, торгууль /хүүхдийн оршин суусан хугацаанаас торгуулийн хэмжээ хамаарна/ төлснөөр хилээр гарах эрх нээгдэнэ. Хүүхдээ бусдад итгэмжлэн нутаг буцааж байгаа тохиолдолд хүүхдийн эх, эцэг итгэмжлэл гаргаж, ЭСЯ-ны Консулын хэлтсээр нотариат хийлгэсэн байна. Итгэмжлэл болон орчуулгын эх хувийг хүүхдийг итгэмжлэн авч яваа хүн биедээ авч явна.

- ТУСГААРЛАХ БАЙР, ТӨЛБӨРИЙН ТУХАЙ –

• Нислэгийн тийз захиалхаас өмнө тусгаарлах байрны 7 хоногийн төлбөр 18-аас дээш насны иргэд 350,000 төгрөг, тээвэрлэлтийн зардал 20,000 төгрөг буюу 370,000 төгрөг, 0-5 насны хүүхэд төлбөргүй, 6-18 насны иргэд 210,000 төгрөг, тээвэрлэлтийн зардал 20,000 төгрөг буюу 230,000 төгрөгийг Онцгой байдлын ерөнхий газрын /Хаан банк 5084538375/ дансанд шилжүүлсэн байхыг анхаарна уу.

• Төлбөр хийхдээ тухайн иргэний ОВОГ, НЭР, РЕГИСТРИЙН ДУГААР болон БАЙРНЫ ТӨЛБӨР гэдгийг заавал тодорхой бичнэ.

http://tabinfo.mn цахим хаягнаас тусгаарлах байрны дэлгэрэнгүй мэдээлэлтэй танилцана уу.

Эх сурвалж: Embassy of Mongolia in Seoul 

Сэтгэгдэл (0)