“Korean Air” Хавай руу 11 дүгээр сараас нислэгээ сэргээхээр төлөвлөж байна

2021-08-17

СӨҮЛ. /Yonhаp/. БНСУ-ын агаарын тээврийн “Korean Air” компани Хавай арал руу үйлддэг нислэгээ ирэх 11 дүгээр сараас буюу БНСУ-д “COVID-19”-ийн эсрэг нийтийн дархлаа тогтоох зорилттой холбогдуулан сэргээхээр төлөвлөж буйгаа өнөөдөр мэдэгджээ.

“Korean Air” 11 дүгээр сараас эхлэн Инчеон хотоос Хавай арал руу долоо хоногт гурван нислэг үйлдэж, цар тахлын нөхцөл байдлыг харгалзан 12 дугаар сараас нислэгийн тоог тав болгон нэмэгдүүлэхээр төлөвлөж байна гэж тус компанийн хэвлэлийн төлөөлөгч мэдээлсэн байна.

Үндэсний далбаа тээгч тус компани энэ оны сүүлээр хилийн чанад руу зорчих хөдөлгөөн нэмэгдэнэ хэмээн урьдчилан тооцоолсны үндсэн дээр энэхүү шийдвэрийг гаргажээ. Харин “Asiana Airlines” компанийн хувьд АНУ-ын тус муж улс руу нислэгээ сэргээх талаар хараахан төлөвлөөгүй байна.

БНСУ-ын агаарын тээврийн хямд өртөгтэй компани болох “Jeju Air” зургаадугаар сарын 8-наас АНУ-ын Сайпан арал руу нислэгээ сэргээсэн бол "Asiana", "T'way Air" уг арал руу долоодугаар сарын 24, 27-ноос тус тус нислэгээ сэргээжээ.

Мөн БНСУ-ын эрх баригчид энэ оны сүүлээс зорчих хөдөлгөөнийг нэмэгдүүлэх зорилтынхоо хүрээнд Гуам, Сингапуртай харилцан зорчих гэрээ байгуулахаар хэлэлцээ хийж байна. 

Эх сурвалж: Montsame.mn 

Сэтгэгдэл (0)