Газар үнэд оров

Газар үнэд оров
Иргэн бүр 0,07 га газар эзэмших эрх хэдэн жилийн өмнөөс нээгдсэн ч нийслэлчүүдийн хувьд хүндрэлтэй байгаа. Учир нь дүүргүүдэд газар байхгүйгээс энэ эрхээ эдэлж чадахгүй байгаа нь нууц биш. Нийслэлийн төвийн хэсэгт газар эзэмшинэ гэвэл ёстой нүдний гэм. Мөнгөтэй, эрхтэн дархтанууд нь зай завсар бүрт барилга барьж, өөрсдийнхөө хувийн эзэмшлийг тогтоогоод буй. Харин хотын захад газар эзэмшинэ гэвэл өндөр уулын орой дээр, эсвэл зөвшөөрөлгүй гэдгээр амаа таглуулдаг. Энэ ч байдлаас үүдээд хашаа босгосон хоосон газрууд үнэд ороод байна. Өөрөөр хэлбэл, гурав, дөрвөн жилийн өмнө хоосон газар 2-4 сая төгрөгийн үнэтэй байсан бол одоо дор хаяж зургаа сая хүрээд байгаа нь нууц биш. Нийслэлийн Сонгинохайрхан дүүрэгт гэхэд хоосон хашаа 8-10 сая төгрөгийн үнэтэй байгаа бол 22-ын товчооны орчимд тав сая төгрөг байна. Харин Баянзүрх дүүрэгт зургаа, Чингэлтэй дүүрэгт хоосон хашаа найман сая төгрөгт хүрч, газар үнэд орсныг харуулж байгаа юм.