Монголын тэргүүн баячуудын тоог нэгээр нэмсэн “Дорнын говь” ХХК-ны захирал Б.Дэлгэрсайхан огцом баяжигчдын тоонд зүй ёсоор ордог. Махны наймаа хийж, Дорноговь аймгаар бужигнуулж явсан энэ эрхэм Сэлэнгэ аймгийн Ерөө сумын 110 сая тонн төмрийн хүдрийн нөөцтэй асар том ордыг өөрийн болгож, “Болд төмөр Ерөө гол” нэртэй компани байгуулснаас хойш олны анхаарлыг татах болсоор удаж байна.

Тус компанийнхан төмөр зам тавих эрхийг Засгийн газраас авч, 3500 вагон Оросоос оруулж ирж, төмрийн хүдрийг Хятад руу зөөн асар их хэмжээний ашиг олж байгаа. Орос руу мах гаргаж, чамлахааргүй мөнгө хуримтлуулсан энэ эр Хятадуудтай нийлснээр баяжих замаа зассан хүн.

Төмрийн хүдэр олборлодог тус компани Ерөөгийн төмрийн хүдрийн ашиглалтын лицензийг яаж авсан нь тун бүрхэг. Учир нь Сэлэнгийн раойны төмрийн хүдрийн ордуудыг Дарханы хар төмөрлөгийн үйлдвэрт олгох, ашиглалтын лиценз авсан компаниудаас буцааж хураах тухай сүржин мэдэгдэл гарч байсан ч энэ яриа нам дарагдаж, “Болд төмер Ерөө гол” компанийнхан үйлдвэрлэлийн нийт хөрөнгө оруулалтанд 179 тэрбум төгрөг, ашиглалтын жилүүдийн дундаж зардалд 114.7 тэрбум төгрөг зарцуулсан хэмээн өөрсдийгөө сурталчилж эхлээд удаж байгаа.

Б.Дэлгэрсайхан захирал хувийн төмөр зам бариулахын тулд 200 гаруй сая ам доллар зарцуулсан юм гэнэлээ. Гэхдээ түүний энэ төмөр зам чамлахааргүй ашиг өгдөг бололтой. “Болд төмөр Ерөө гол” компани ганцхан жилийн дотор 930-аад мянган тонн төмрийн хүдрийн ачилт хийж, БНХАУ руу экспортолсон гэдэг тоо баримт байгаа юм.

Олноос тун нууцлаг амьдардаг Б.Дэлгэрсайхан захирал хоёр жилийн өмне “Акуа” фитнесийн багш Укатай хамт амьдарч, хүүхэдтэй болсон тухай мэдээлэл олныг шуугиулж байлаа. Хоёр ч хүүхэдтэй, хүүхдүүд нь гадаадад амьдардаг Б.Дэлгэрсайхан захирал энэ мэдээг үгүйсгэх гэж хэр чадлаараа оролдсон ч сонин хэвлэлүүд шүүрч бичин, түүний хувийн амьдралдаа хийсэн огцом өөрчлөлт даравч далдайж, булавч бултайсаар олонд ил тод болсон.

Хувьдаа 3500 вогантай энэ баян эр Зайсангийн “Грийн Вилла” хотхонд өндөр үнэтэй байр авч, шинэ амьдралаа тохинуулсан ч бүтэлгүйтэж, усны гүнж гэж нэрлэгддэг Ука хүүхдээ ганцаараа өсгөх дээрээ тулаад байна. Өөрөөсөө 30 гаруй насаар ах, баян эрийн халамжинд амьдарч байсан Ука бүсгүйд Б.Дэлгэрсайхан захирал усан бассейн бэлэглэж, гадаадад хамт зугаалж, гар татахгүй эрхлүүлдэг байсан ч түүнийг орхиж, хосууд салж байгаа аж.

Хэтэрхий их тансаг зүйлд дуртай, бас байнга олны хэл аманд өртөж, энд тэнд нүцгэн зургаа авахуулахаас хэзээ ч буцдаггүй Ука бүсгүй, бүх зүйлд тооцоотой хандахыг эрхэмлэдэг, бас яхир зожигдуу зантай Б.Дэлгэрсайхан захирал хоёрын ааш зан эвлэрч нийлээгүйгээс болж дуулиантай хосууд чимээ, шуугиангүйхэн шиг салсан гэж тэдний амьдралыг мэдэх хүмүүс ярьж байна.

Эх сурвалж: “Тэргүүн”