Монголд мэс засал хийлгэчихээд АНУ, Солонгост хийлгэсэн гэж ярьцгаадаг


-ХӨХ ТОМРУУЛАХ МЭС ЗАСАЛ ХИЙЛГЭСЭН ХҮН ХҮҮХДЭЭ ХӨХҮҮЛЖ БОЛНО-

 

“Перфект” пластик мэс заслын эмнэлгийн эмч Н.Оюунтай уулзаж ярилцлаа.

-Пластик мэс заслаар хүний олдмол болон төрөлхийн гажиг согогийг засдаг. Харин косметик мэс заслаар хүний хүссэн тэр л төрх хэлбэрийг бий болгохыг зорьдог юм.

-Гоо сайхны хагалгаа анх хэдэн оноос манайд хийгдэж эхэлсэн бэ. Эмнэлгийн үйлчилгээний биеэ даасан салбар болж хөгжиж чадсан уу?

-Гоо сайхны мэс засал нь нөхөн сэргээх буюу пластик мэс заслын багахан хэсэг гэж ойлгож болно. Энэ төрлийн мэс заслууд манай улсыг социалист системд байх үеэс хийгдсээр ирсэн. Жишээ нь гэмтэж далийсан хамар, дэлдэн чих засах, хамар чихгүй хүнд нөхөн сэргээлт хийх гэх мэт, Давхраа гаргах мэс заслыг анх Монголд тэр үеийн   ЗХУ-ын   орос зөвлөх К.К.Замятин 1987 онд манай эмч, сувилагч нартай хийсэн юм. Ер нь аливаа гоо сайхны мэс заслыг нөхөн сэргээх мэс заслын мэдлэггүйгээр хийх гэж оролдох нь жинхэнэ халтуур болно. Ийм тохиолдолд тухайн мэс заслын улбаатай хүндрэлүүд их гарна. Тиймээс дэлхийн аль ч улсад гоо сайхны мэс засалч гэдэг нарийн мэргэшлийн лиценз огт байдаггүй. Тухайн эмч гоо сайхны мэс засал хийж л байгаа бол нөхөн сэргээх мэс засал шаардлагатай түлэгдсэн, гэмтсэн, эд эрхтнээ тайруулсан бас төрөлхийн гажигтай төрсөн хүүхдэд тодорхой хэмжээгээр тусламж үзүүлж чаддаг байх ёстой. Одоогоор манай улсад пластик болон косметик мэс заслыг цогц байдлаар нь хийдэг эмнэлгүүд тун цөөн байгаа нь энэ мэргэжлээр резидентурын сургалт хийгдэхгүй байгаатай холбоотой.

-Хөрш зэргэлдээ болон бусад орнуудтай харьцуулахад энэ төрлийн мэс ажилбар хийдэг манай эмч нарын мэргэшил, ур чадварын төвшин хэр байдаг вэ?

-Манай эмнэлэг дээр АНУ, Солонгос, Япон, Сингапур, Герман зэрэг өндөр хөгжилтэй оронд мэс засал хийлгээд ирсэн хүмүүс бидэнд хандаж дахин мэс ажилбарт ордог тохиолдол цөөнгүй байдаг. Монголд мэс засал хийлгэчихээд Солонгос, Сингапур, АНУ-д хийлгэсэн гэж ярьдаг олны танил хүмүүс ч олон бий. Гэхдээ энэ бүхнээр өөрсдийгөө дөвийлгэх гэсэн юм биш харин бид нэг их хоцрогдчихоогүй гэдгийг л хэлэх гэсэн юм.

-Пластик мэс наслын эмч нарыг хаана бэлтгэж байна. Манайдаа сургаж байгаа юу?

-Пластик мэс засалчдыг дэлхийн аль ч өндөр хөгжсөн улсад анагаахын сургууль төгссөн эмч нь дахин 4-6 жилийн туршид резидентурт суралцаж бэлтгэгддэг. Одоогоор манай улсын анагаахын салбарт нарийн мэргэшлийн эмч бэлтгэх ийм урт хугацаатай хөтөлбөр байхгүй. Олон жилийн резидентурын төлбөрөө төлөөд суралцах хүн ч ховор. Сургалт, практик, судалгаа шинжилгээ гурав нэгэн цогц болохгүй бол энэ ер нь бүтэхэд бэрх л дээ. Тэгэхээр пластик мэс засал ч болж косметик хагалгаануудыг хийхийн тулд дахин 5-6 жил суралцах ёстой.

-Танай эмнэлгийн хувьд хичнээн төрлийн ямар хагалгаанууд хийж байна вэ?

-Пластик мэс засал нь зөвхөн хэдхэн тооны мэс заслын аргачлалаар хязгаарладаггүй өргөн цар хүрээтэй. Тиймээс ихийг уншиж, хийж, сэдэж тархиа байнга ажиллуулахыг шаарддаг өндөр хариуцлагатай мэргэжил. Бидний хийдэг хагалгаануудын 80 хувь нь нүүр хүзүүний хэсэг байдаг. Тэгэхээр энэ хэсгийн гэмтэл, түлэгдэл, үрэвсэл, төрөлхийн гажгуудад нөхөн сэргээх мэс заслуудыг хийнэ. Мөн косметик мэс заслуудын бүх төрлийг тухайлбал хөх, өгзөг, хөлийн булчин томруулах, өөх сорох болон өөх шилжүүлэх, нүүр, дух, хөмсөг өргөлтүүдийг дурангаар хийх зэрэг хүмүүсийн зөвхөн давхраа хамар засах гэдэг ойлголтоос хавьгүй олон төрлийн мэс заслуудыг хийдэг.

-Манайд өөхөө соруулаад нас барсан золгүй тохиолдол гарч байсан. Өөх соруулах мэс ажилбарыг хийхэд эрсдэл ихтэй юу?

-Бид ийм ажилбарыг 1998 оноос хойш хийж өнгөрсөн 14 жилийн туршид трдорхой хэмжээний туршлага хуримтлуулсан. Гэтэл Монголд энэ олон жилийн туршлага байсаар байтал 2010 онд Эх нялхсын эрдэм шинжилгээний төв эмнэлэг дээр энэ харамсалтай хэрэг гарсан. Тэгэхэд хүмүүс ийм мэс ажилбарыг анх удаа Монголд хийж байгаа гэж ойлгосон юм шиг байгаа юм. Ер нь өөх соруулах нь таргалалтыг зогсоож тураах арга биш. Харин биеийн галбир засах ажилбар юм л даа.

-Сүүлийн үед төрөлхийн гажигтай болон уруул сэтэрхий, тагнай нь цоорхой хүүхэд төрөх нь элбэгшжээ. Энэ төрлийн хагалгааг хийдэг үү?

-Монголд төрж байгаа төрөлхийн сэтэрхий уруул тагнайтай хүүхдүүдийн төрөлт дэлхийн дундажтай ойролцоо байна. Ийм гажгийг манай эмнэлгийн эмч нар засалгүй яахав. Би олон улсын мэс засалчдын багт оролцож бусад бага буурай хөгжилтэй улсуудад очиж ийм төрлийн мэс заслуудыг хийдгийн хувьд манайд төрж байгаа ийм хүүхдүүдэд чадах чинээгээрээ тус болж чадах хамгийн сайхан боломж гэж ойлгодог.

-Төлбөр үнэ өртгийн хувьд бусад оронтой харьцуулахад ямар байдаг вэ?

-Төрөлхийн сэтэрхий уруул тагнайтай хүүхдэд огт үнэ төлбөргүй хагалгаа хийдэг. Харин өвчин эмгэгтэй өвчтөнүүд зардлаа л төлнө. Гоо сайхны мэс заслын төлбөрүүд манайд бусад улсуудынхаас 5-10 дахин хямд байгаа.

-Танайд гаднаас эмч нар ирж төлөвлөсөн хагалгаа хийдэг үү?

-Бид Америкийн пластик мэс заслын эмч нартай байнгын харилцаатай өдөр бүр e-mail-ээр холбогдож санал бодлоо хуваалцдаг. Тэд нар маань үе үе Монголд ирэх дуртай. Тэр үед бид хамтарч хагалгаа хийдэг.

-Олны танил болон бусад эмчлүүлэгч, үйлчлүүлэгчдийн талаарх хувийн нууцыг хадгалдаг уу. Энэ төрлийн гэрээг эмчлүүлэгчидтэйгээ хийдэг үү?

-Олны танил хүмүүст бид янз бүрийн л мэс засал хийсэн. Тэдний тухай сонин хэвлэл, радио телевизээр нэг ч мэдэгдэл хийгээгүй, хийх ч үгүй. Харин зарим нэг тохиолдолд жишээ татаж тухайлсан нэг үйлчлүүлэгчид ярьж болно. Учир нь энэ тухай бид хэнтэй ч огт гэрээ хийгээгүй. Харамсалтай нь тэдний олонх манай эмнэлгээр үйлчлүүлчихээд түүнийгээ таг нуучихдаг эсвэл гадаадад хийлгэсэн мэтээр ярьдаг учраас хүмүүст буруу мэдээлэл тардаг.

-Хөх томруулах мэс засал хийлгэсэн бол хүүхэд төрүүлж хөхүүлж болох уу?

-Хөх томруулах нь хөхний булчирхайд огт хамаагүй мэс засал юм. Хөх томруулдаг суулгац нь хөхний булчирхайг огт хөндөлгүйгээр түүний ард байрлах цээжний булчингийн доор суулгадаг. АНУ-д хөхний имплантыг амьтан дээр 10 гаруй жил, бас хөхний хавдраас болж хөхөө тайруулсан эмэгтэйчүүд дээр 10 гаруй жил туршсаны эцэст баталгаажуулсан, хуулиараа төгс зөвшөөрөгдсөн байдаг. Иймээс та хөхөө томруулчихвал хүүхдээ хөхүүлж чадахгүй болчихно гэж айх хэрэггүй.

 

Л.БОЛОРЦЭЦЭГ /мэдээ.мн/

profile