Дуу бүхэн энэ орчлонд хүмүүнийг уярааж, магадгүй ухааруулахаар ирэхдээ ямар нэгэн дурсамж, үүх түүх агуулсан байдаг. МУ-ын СТА Д.Намсрайноровын “Сэвлэг шиг… Бүүвэй шиг…” нэртэй шинэ цомог худалдаанд гараад долоо хонож байна. Тэрээр цомогтоо урьд хожид бидний сонсож байгаагүй гэгэлгэн дуунуудаас гадна 60,70-аад оны хоёр дууг сэргээн дуулжээ. “Хожуу хайрын дуу” хэмээх гайхамшигт уран бүтээлийн тухай түүнээс тодрууллаа.
-Шинэ цомог гаргасан танд баяр хүргэе. Хуучны дууг сэргээн дуулсан явдал сонирхолтой санагдлаа. Одооны залуус бол огт сонсоогүй шүү дээ?
-Би ер нь 60,70-аад оны уран бүтээлийг дуулахаас зүрхшээдэг юм. Ахмад, сайхан уран бүтээлчдийнхээ дууг дуулна гэдэг асар хариуцлагатай. Тийм учраас дуулна гэсэн бодол ер төрдөггүй байлаа. Сүхбаатар аймаг руу лам багштайгаа хамт явж байтал багш маань амандаа дэндүү аялгуулаг сайхан дуу дуулаад байна аа. Түүний үеийнхэн энэ дуунд их дуртай юм билээ. Багш намайг энэ дууг дуулвал яасан юм бэ гэдэг санал тавьсан. Дуу үнэхээр таалагдсан л даа. Багшийнхаа захиасаар “Хожуу хайрын дуу”-г дуулсан. Манай аав, ээж хоёр “Чи минь битгий мартаарай”-г дуулах маш дуртай. Энэ дууг бол аав, ээж хоёрынхоо захиасаар дуулсан.
-“Хожуу хайрын дуу”-ны аяыг зохиосон Чинзориг агсны гэргийгээс зөвшөөрөл авсан уу?
-“Хожуу хайрын дуу”-ны үгийг Төрийн соёрхолт, Ардын уран зохиолч Б.Лхагвасүрэн гуай зохиож, аяыг нь Ц.Чинзориг агсан зохиогоод, Төмөрбаатар гуай дуулсан байдаг. Миний хувьд Төмөрбаатар гуай, Лхагвасүрэн гуай хоёроос зөвшөөрөл авсан.
-Уран бүтээл нь сэргээгдэж байгаа болохоор тэдэнд цааргалах зүйл гараагүй байх л даа?
-Тэгэлгүй яахав. Хамгийн гол нь маш сайн дуулж, ард түмэндээ хүргээрэй гэж хэлсэн. Энэ дууны сэдвийг хараад олзуурхсан л даа. Цомогт багтсан шинэ дуунууд ихэнх нь гэгээн хайрынх. “Хожуу хайрын дуу” болохоор хүний амьдралын алдаа, оноог харуулсан, гэгэлгэн өнгө аястай. Хорвоогийн гарцаагүй үнэнийг хөнгөн гунигаар илэрхийлсэн дуу.

Н.Энх shock.mn

Үг.Б.Лхагвасүрэн             Ая.Ц.Чинзориг
Хожуу хайрын дуу
Нүд чинь талимаараад даанч сайхан
Нүглийн шүд хүрээгүй алиман дээр суусан
Хар цоохор эрвээхэй
Хатан сормуусаа билүүднэ
Ханьтай чиний харцанд багтаад
Ханилахгүй байхад яая гэхэв дээ
Альхан нэгэн жимээр төөрөөд
Учрахгүй байхад яахав дээ
Царай чинь туяараад даанч сайхан
Цээжний гүнд эгшиглэх дуунд согтсон
Бор цоохор янзага
Бодлын мананд төөрнө
Ханьтай чиний харцанд багтаад
Ханилахгүй байхад яая гэхэв дээ
Амьдын хорвоод бие биенээ хайрлаад
Амьдарч явбал боллоо доо